បាក់ស្រុតផ្ទះប្រជាពលដ្ឋ ១ខ្នង​ ចូលទន្លេសាប​ និង៣ខ្នងទៀត បានបាក់ស្រុតដាច់ជើងសរសរផ្នែកខាងក្រោយ បង្ខំចិត្តរុះរើចេញ​ នៅសង្កាត់ព្រែកតាសេក​ ខណ្ឌជ្រោយចង្វារ

ភ្នំពេញ៖​ ផ្ទះប្រជាពលរដ្ឋ ដែលរស់នៅតាមមាត់ច្រាំងទន្លេសាប១ខ្នង​ ត្រូវទឹកគួច ច្រោះ បាក់ស្រុតចូលទៅក្នុងទន្លេ និងចំនួន​ ៣ខ្នងទៀត បានបាក់ស្រុតដាច់ជើងសរសរផ្នែកខាងក្រោយ បង្ខំចិត្តរុះរើចេញដើម្បីបញ្ចៀសគ្រោះថ្នាក់ខណៈដែលទឹកទន្លេកំពុងតែហក់ឡើងខ្ពស់។

កណីនេះបានកើតឡើងកាលពីវេលាម៉ោងប្រមាណ​ ១១ព្រឹកថ្ងៃទី២០​ ខែកញ្ញា ឆ្នាំ២០២៣ នៅចំណុចច្រាំងទន្លេសាបក្នុងភូមិ ព្រែកតាគង់​ សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។​ ទោះបីជាយ៉ាងណា នៅក្នុងការបាក់ស្រុតផ្ទះនេះ ពុំបណ្តាលឱ្យមនុស្សរងគ្រោះថ្នាក់ឡើយ។

ផ្ទះដែលបាក់ស្រុតចូលក្នុងទន្លេ ជាផ្ទះធ្វើពីឈើប្រក់ស័ង្កសី ដែលមានទំហំប្រមាណ៧ម៉ែត្រ​ គុណប្រមាណជា១០ម៉ែត្រ ។​ ចំណែក ៣ខ្នងទៀត ធ្វើពីថ្មក្រោមឈើលើ​ ប្រក់ស័ង្កសី បានបាក់ស្រុតជើងសរសរផ្នែកខាងក្រោយប្រឈមមុខគ្រោះថ្នាក់​ និងត្រូវរុះរើចេញ។

យោងតាមព័ត៌មានពីកន្លែកេីតហេតុ​ បានឱ្យដឹងថា នៅមុនពេលកើតហេតុ ម្ចាស់ផ្ទះពុំបាននៅផ្ទះឡើយ បានចាក់សោរទុកចោល ស្រាប់តែផ្ទះ១ខ្នងនោះបានបាក់ស្រុតចូលទៅក្នុងទន្លេ ដោយពុំយកបានអ្វីឡើយ។ បន្ទាប់មកក៏បានបាក់ស្រុកផ្ទះជាបន្តបន្ទាប់៣ខ្នងទៀត ក្នុងនោះបណ្តាល២ខ្នងដាច់ជើងសរសរក្រោយ​ និង១ខ្នងប្រឈម​ ហើយម្ចាស់បានបង្ខំចិត្តរុះរើចេញដើម្បីបញ្ចៀសនូវគ្រោះថ្នាក់។

ចំពោះមូលហេតុ ដែលបណ្តាលឱ្យបាក់ស្រុតផ្ទះ​ ដោយសារតែទឹកឡើងខ្លាំង ស្រុតដីបាក់ច្រាំងទន្លេនាំឱ្យបាក់ស្រុតផ្ទះ ដែលសង់នៅជាប់មាត់ច្រាំងចូលក្នុងទន្លេតែម្តង៕