រថយន្ត២គ្រឿងបើកគេចគោលដៅសមត្ថកិច្ច លុះឃាត់បានបែកធ្លាយបទល្មើសបង្កប់ក្នុងរថយន្ត (មានវីដេអូ)
រាជធានីភ្នំពេញ ៖ រថយន្ត២គ្រឿងបើកគេចគោលដៅសមត្ថកិច្ចដែលកំពុងតែឆែកឆេរអាវុធជាតិផ្ទុះ និងពិនិត្យជាតិអាល់កុល ខណៈពេលភ្លាមៗនោះ កម្លាំងសមត្ថកិច្ចក៏ធ្វើការដេញតាមឃាត់រថយន្តទាំង២គ្រឿងនោះតែម្ដង លុះធ្វើការឆែកឆេរ ក៏ស្រាប់តែប្រទះឃើញរថយន្តមួយគ្រឿងលួ.ចបង្កប់ទៅដោយឈើប្រណីតពេញរថយន្ត ចំណែករថយន្តមួយគ្រឿងទៀត គឺជាអ្នកនាំផ្លូវ។ បន្ទាប់មក សមត្ថកិច្ចនគរបាលក៏ឃាត់ខ្លួនអ្នកបើកបររថយន្តដឹកឈើ និងរថយន្តដែលសង្ស័យថា ជាអ្នកនាំផ្លូវ នាំយកទៅសួរនាំភ្លាមៗ បង្កឱ្យមានការភ្ញាក់ផ្អើលកាលពីយប់ថ្ងៃទី២៨ ខែមករា ឆ្នាំ២០២៤ នៅចំណុចផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
រថយន្តដឹកឈើខាងលើនេះ ម៉ាកស៊ីណា ពណ៌ស ពាក់ស្លាកលេខ ភ្នំពេញ2O-1659 មានគ្នា២នាក់ ដឹកឈើប្រណីតពេញរថយន្ត ចំណែករថយន្តមួយគ្រឿងទៀត ម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ2AJ-0327 ជិះប្ដីប្រពន្ធ២នាក់ និងកូនតូចម្នាក់ទៀត។
តាមប្រភពព័ត៌មានពីកម្លាំងសមត្ថកិច្ចនគរបាលខណ្ឌសែនសុខ បានប្រាប់ឱ្យដឹងថា «នៅមុនពេលកើតហេតុ កម្លាំងសមត្ថកិច្ចនគរបាលខណ្ឌសែនសុខ បានចុះឆែកអាវុធជាតិផ្ទុះ និងពិនិត្យជាតិអាល់កុល នៅតាមបណ្ដោយផ្លូវលេខ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ក៏ប្រទះឃើញរថយន្ដចំនួន២គ្រឿងបើកគេចគោលដៅសមត្ថកិច្ចនគរបាលខណ្ឌសែនសុខ ដែលកំពុងតែចុះអនុវត្តច្បាប់ចរាចរណ៍។ ក្នុងនោះ រថយន្តកាមរីបាឡែន ពណ៌ទឹកប្រាក់ បើកខាងមុខ ចំណែករថយន្តម៉ាកស៊ីណា ពណ៌ស បើកខាងក្រោយ បន្ទាប់មកកម្លាំងសមត្ថកិច្ចនគរបាលខណ្ឌសែនសុខ បានដេញតាមឃាត់ភ្លាមៗ»។
សមត្ថកិច្ចនគរបាលខណ្ឌសែនសុខ បានបន្តទៀតថា «មុនដំបូង កម្លាំងសមត្ថកិច្ចនគរបាលខណ្ឌសែនសុខ បានឃាត់រថយន្តម៉ាកស៊ីណា ដែលបើកខាងក្រោយ ក៏ប្រទះឃើញឈើប្រណីតពេញមួយរថយន្ត ដោយមិនទាន់ដឹងថា តើជាឈើប្រភេទអ្វីនោះទេ?។ ចំណែកអ្នកបើកបររថយន្តវិញ មិនសហការជាមួយកម្លាំងសមត្ថកិច្ចឡើយ បន្ទាប់មកក៏ត្រូវកម្លាំងសមត្ថកិច្ចនគរបាលចាប់វា.យខ្នោះទាំង២នាក់តែម្ដង។
Post a Comment